«Энерел» ачы-дуза фондузу биле «Тываның даш чонукчуларының эвилели» хөй-ниити организация кады ажылдажылгага атты салган. Керээ ёзугаар регионнуң девискээринде кадыкшылының аайы-биле харык-шинээ кызыгаарлыг уруглар, тускай шериг операциязының киржикчилериниң ажы-төлү база чалыы армейжилерни чонар-даштың уран чүүлүнге мастерлер өөредир.
Чоокта чаа Чурукчулар бажыңынга фондунуң хайгааралында турар уругларга даш чонарының уран чүүлүнге баштайгы мастер-классты эрттирген.
Айдың Шивидек, «Энерел» ачы-дуза фондузунуң удуртукчузу:
— Тываның даш чонукчуларының эвилели» хөй-ниити организация-биле кончуг чугула, харын-даа херек дугуржулганы кылдывыс. Арга-дуржулгалыг даш чонукчузу Ай-Демир Шыырап бистиң саналывысты деткип, тыва чоннуң национал культуразының база бир ховар дээн угланыышкынынга уругларны өөредир. Фондувустуң хайгааралында турар уруглар бүгү талалыг сайзыраарын күзеп турар бис. Чогаадыкчы ажыл-чорудулга үезинде уругларның сагыш-сеткили оожургаар, угаан-бодалы сайзыраар, ооң-биле чергелештир боттарының холу-биле республикавыстың онзагай овур-хевирин сиилбип өөренирлер.
Ай-Демир Шыырап, «Тываның даш чонукчуларының эвилели» хөй-ниити организацияның даргазы:
— Баштай уругларның холун чаңчыктырар, гипс-биле ажылдаар, оон чөвүрээни чазаар. Оон чоорту чонар-даш-биле ажылдап эгелээр. Уруглар дыка сонуургап турар. «Энерел» ачы-дуза фондузунуң удуртукчузу Айдың Шивидектиң саналын эвилелдиң кежигүннери, даш чонукчулары, деткээн.
Мира КОНГУЛ-ООЛ.
Чуруктарны социал четкилерден алган
Долузу-биле «Тыванын аныяктары» солуннуң сентябрь айның номеринде
