Сотпа Шалган ада-иезиниң дун оглу болуп төрүттүнген. Бичиизинден тура-ла шериг албанын дыка сонуургаар, шериг хеп-сынныг кижилерни магадап көөр, шеригжи болур күзели чажындан-на күштүг турган. Школа дооскаш, шериг албан-хүлээлгезин эрттирер сорулгалыг турган. 18 харлапкаш, ол дораан шериг комиссариадынче боду чеде берген. Ынчалза-даа чүрээнде аарыының уржуундан, ол комиссияны эртпээн.
Ада-иезинге, чоок улузунга, кымга-даа ыыттавайн, тускайлаттынган шериг операциязынга киржири-биле керээни чарып алгаш чорупкан болган.

Тускай шериг операциязында чажыт ады – Шаман. Ол Донецк Улус Республиканың Покровск угланыышкынынга шериг албанын эрттирип тургаш, эрес-дидимин көргүскен.
Амгы үеде дайын шөлүнде халдаашкын дроннар дузазы-биле колдуунда чоруп турарын шупту билир бис. Ол дайынчыларга улуг удурланыкчы болуп турар. Шаман эш-өөрү-биле чорааш база ындыг байдалга таваржы берген. Дайзынның дрону шериглерниң бөлүүн көрүп кааш, “Баба Яга” деп ужар коптерден бомбаны октаан. Бир дугаарында чазыпкан. Ийи дугаар октаарга, Шаман эштерин камгалаар дээш боду кыдыынче аңгыландыр халып, дайзынның кичээнгейин бодунче угландыргаш, маадырлыы-биле амы-тынындан чарылган. Чаныш-сыныш чок, эрес-дидим чүректиг дайынчы ынчалдыр хөй эштерин камгалаан. Сотпа Шалганны маадырлыг чоруу дээш “Эрес-дидим чорук” ордени-биле мөчээн соонда шаңнаан.

Ол дайын шөлүнден авазы-биле харылзажып тура: “Авай, мен бээр келгенимге хомудавас мен. Мээң изиг күзелим боттанган, маңаа дыка херек-тир мен” – деп, авазынга чугаалап турган. Чок болурунуң мурнунда авазынга: “Авай, сен оглуң дээш чоргаарланыр сен, мен Маадыр болур мен” — деп телефонга чагааны бижээн….

Чалыы маадырның ада-иези оглунуң чырык адынга тураскаадып, ооң мага-бодун шуткаан тураскаалды Ийи-Тал сумузунда аграр школаның девискээринде ажыткан. Тураскаалды чурукчу Радомир Балган шуткуп кылган.

Чалыы дайынчы маадыр оглувустуң чырык ады, маадырлыг чоруу кезээ мөңгеде чүректерге артар.

«Улуг-Хем» солуну