Аныяк-өскен ортузунга Шагаа байырлалы кайгамчыктыг солун, чараш, өөрүшкү-маңнайлыг эрткен. Оолдар, уруглар ала-чайгаар хей-аът көдүрлүүшкүннүг, онзагай хөөн-биле хемчегге киришкеннер.

Аныяктар ордузунуң шил залын долдур чымчак дөжектерни чаткан. Хемчегниң киржикчилери бөлүк-бөлүү-биле олургулапкаш, «Буга-шыдыраа», «Кажык», «Аът шалбаалары» дээш оон-даа өске тыва национал оюннарны ойнап, аразында чугаалажып, уттундурбас үени эрттиргеннер.

Шагааны байырлап тургаш, оолдар, уруглар боттарының салым-чаяаны-биле өскелерни өөрткен. Школачылар Дамбаа Монгуш база Кайгал Дамыран чүгле хөөмей-сыгытты күүсеткен эвес, а национал хөгжүм херекселдеринге ойнавышаан, ырлааннар. Олар онзагай ыры күүселдезинден аңгыда, эш-өөрүнге солун мастер-классты эрттирген: дошпулуур, хомус дугайында таныштырбышаан, хөгжүм херекселдеринге аялгаларны ойнаарын көргүскен.

«Эзир-Кара» деп алдарлыг ырының үзүндүзүн Кызыл хоорайның 15 дугаар лицейиниң өөреникчизи, 7 харлыг Байыр-Хаан Суктер ырлап күүсеткен.

Оон аңгыда Тыва кадет корпузундан Айдаш Маады хемчегниң база бир маадыры болган. Ол тывызыктар, дүрген чугаалар, үлегер домактарны эки билирин көргүскеш, барык шупту шаңналдарны чаалап алган.

Тыва чоннуң езу-чаңчылдарын, культуразын, национал онзагайларын кадагалап арттырары-биле, Шагаа байырлалын аныяк-өскен ортузунга эрттирер дээн Баштайгыларның күзелин регионнуң Аныяктар херектериниң талазы-биле яамызы база Национал школа хөгжүдер институттуң коллективтери деткээнин сагындыраал.

Столда делгээн боорзак, далган, тараа, өреме дээш оон-даа өске национал аъш-чемнерни белеткээриниң дугайында башкылар солун тайылбырны кылган.

Баштайгыларның медээзинден Мира КОНГУЛ-ООЛ белеткээн.

Чуруктар Движение Первых | Тыва