«Бистиң республикага сонуургал улгадып турары өөрүнчүг-дүр. Тываже кээп турар аян-чорукчулар болгаш аалчылар саны көвүдеп турар. Россияның эң улуг сарыг шажын хүрээзин, чурттуң эң улуг Будда дүрзүзүн, «Азия төвү» скульптура комплекизин, бистиң музейивисте онзагай скиф алдын экспонаттарны болгаш өске-даа онзагай черлерни көөр дээш хөй чон кээп эгелээн. Келир чылын бүгү Россиядан болгаш даштыкыдан аалчыларны хаара тудар 4-кү делегей чергелиг сарыг шажынчы шуулганны эрттирер бис. Аалчылар хүлээп алырынга таарымчалыг байдалдарны тургузар ужурлуг бис.
Үш сылдыстыг гостиница комплекизи найысылалдың база бир онзагай оран-савазы болур ужурлуг. Төлевилел чаа ажылчын олуттарны тургузуп, моон соңгаар сайзыралдың үндезини болур. Cosmos Hotel Group деп туризм талазы-биле Россияда эң-не улуг оператор инвестор болбушаан, чаа аалчылар бажыңының тудуун хүлээнип, керээни чарган. Ол Россияның 26 хоорайлары-биле ажылдап турар. Төлевилелди боттандырар керээни 2024 чылда Санкт-Петербургтуң делегей чергелиг экономиктиг форумунга «Космос» гостиницалар бөлүүнүң президентизи Александр Петрович Биба-биле чарган турган. Ол дээрге бистиң республиканың туризм адырының хөгжүлдезинге онзагай базым-дыр» – деп, ол демдеглээн.
Шынап-ла, чаа ажыттынган хүрээ Тыва чуртунга делегей чергелиг эртем-практиктиг конференциялар эрттиреринге, сарыг шажынның өөредиин чорударынга, төвүт медицинаны амыдыралга ажыглаарынга улуг ужур-дузалыг болуп турар. Оон аңгыда бо хүрээ делегейниң аңгы-аңгы чурттарында чурттап чоруур чүдүкчүлерни, республиканың аалчыларын, чурттакчыларын хаара тудар чери апаары магатчок.
Чүгле шажын-чүдүлгениң сайзыралынга эвес, а регионга туризм талазы-биле хөгжүлдеге улуг идиг болур дээрзи чугаажок. Чүге дээрге делегейниң янзы-бүрү булуңнарындан шажынчылар-даа, аян-чорукчулар-даа келир дээрзи билдингир. Аян-чорукчулар дээрге-ле туризмниң хөгжүлдези болгай. А кажан туризм хөгжүүрге үндүрүглер, ажылчын олуттар дээш аян-чорукчулардан кирер орулга тус черниң чурттакчы чонунга чурттаарынга таарымчалыг байдалдарны тургузар дээрзи билдингир.
Айдың ОНДАР.
Чурукту ТР-ниң Чазааның сайтызындан алган.
