Кызыл хоорайның Щетинкин-Кравченко кудумчузунуң 37 дугаар бажыңының ханазында хостуг стильге аныяктарның граффитизи чурттакчы чонну магададыр.
«Тываның тугу болгаш аякта сүттүг шайны туткан аныяк кыс уругнуң овур-хевири болгаш мерген угаанны, билиглерни илередип турар үгүнүң дүрзүзүн аңаа чуруур. Граффити аныяктарның болгаш бистиң херээжен чонувустуң күжүн илередир. Үгү дээрге удуртулганың мерген угааны болгаш республикавыстың камгалалы болур. А тук биле кыс кижиниң овур-хевири төрээн чуртунга ынакшылды база чуртувус дээш чоргааралды илередип турар. Аякта сүттүг шай бистиң аалчыларга, чурттакчыларга болгаш езу-чаңчылывыска хүндүткеливисти көргүскен. Бо граффити Кызыл хоорайның аныяк херээжен чонунга, кыс уругларга тураскааттынган» — деп, Михаил Ондар бодунуң блогунда бижээн.
