Анай-Хаак Достай — аныяк малчын. Ол — 2016 чылдан бээр «Аныяк өг-бүлеге — кыштаг» губернатор төлевилелиниң киржикчизи.

Анай-Хаак Достай мал ажылы-биле чажындан тура таныш. Мөңгүн-Тайга кожууннуң Мугур-Аксы сумузунда хөй уруг-дарыглыг малчын өг-бүлениң уруу.

Бедик дагларлыг, амыр эвес агаар- бойдустуг кожуунга көшкүн амыдырал берге-даа болза, ол кезээде ажыл-ижинге бердинген, харыысалгалыг. Ооң кол сорулгазы — анай бүрүзүн камгалап, малдың дүгүн көвүдедирин чедип алыры.

Анай-Хаак Достай чылдан чылче шээр малының баш санын өстүрүп, мал ажыл-­агыйының бүдүрүлгезин бедидер дээш, кызымаккай ажылдап турар. Сиген кезилдезиниң үезинде кезээде мал чемин кышка чедер кылдыр белеткээр. Ооң ак сеткилдиг, тывынгыр, кызымаккай ажыл-ижиниң ачызында малының баш саны чылдан чылче эки көргүзүглерлиг.

Эрткен кыжын кажааларының ишти дошталы бээрге, аныяк өг-бүле бергелерге торулбаан. Күш-ажылчы аныяктар боттарының күжү-биле кажаа-хораазын аштап, чылыглап ап турар. Анай-Хаак Достай хойларының ажаалдазынче улуг кичээнгейни салып, кыргылданы хол хачызы-биле доозуп ап турар. Ол ышкаш одар-белчиирлиг черлерин шын ажыглап, зоогигиениалыг, ветеринарлыг нормаларны сагып турар.

Аныяк малчыннар Анай-Хаак Борзек-ооловна Достайның өгбүлези мал ажыл-­агыйында бедик харыысалгалыын көргүзүп, чаңгыс чер чурттугларының хүндүткелин чаалап алган.

Мира КОНГУЛ-ООЛ белеткээн.
Чурукту социал четкилерден алган