Регионда «Чалыы армейжилер» шимчээшкинниң удуртукчузу Айдың Шивидек Тываның Баштыңының Айыткалынга хамаарыштыр бодалын илереткенин Республиканың немелде өөредилге сайзырадыр төвү дыңнаткан .
– Тываның Баштыңы 2025 чылда республиканың социал-экономиктиг хөгжүлдезиниң түңнелдерин үндүргеш, 2026 чылда угланыышкыннарының дугайында илеткээн.
Ол 2026 чылды Тургузукчу күш-ажылдың болгаш өг-бүле ыдыктарының чылы кылдыр чарлаан.
Чарлаттынган чылда республикада база бир күш-ажылчы өг-бүлени таныштырайн. Эрткен субботада Балгазын суурда хөй ажы-төлдүг Хертектерниң өг-бүлезинге четтим. Өгнүң эр ээзи өшкүлерни азырап турар. Өөнүң ишти Снежана Алдын-ооловна – күш-ажылчы, омак-сергек херээженнерниң бирээзи. Ортумак өөредилге чериниң хөй-ниити чуртталга бажыңында кижизидикчи башкы кылдыр ажылдап чоруур. Ооң бурунгаар чүткүлүнүң үндезини – чаагай амыдыралче быжыг бүзүрел, уруг-дарыынга ынакшылы. Ол уругларының кижизидилгези, өөредилгези, кадыкшылы болгаш хөй талалыг сайзыралынче бүгү боду-биле бердинген.
Ол ышкаш Шагааның бүдүү айында өг-бүлеге хөмүр-дашты болгаш уруг-дарыынга чылыг идик-хепти чедирдивис.
