Аныяктарга күрүне деткимчези
Аныяк чоннуң амыдырал-чуртталгазын экижидери болгаш оларның үре-түңнелдиг өөредилгезинге идигни бээри-биле, дээди өөредилге черин кызыл диплом-биле доосканнарга чуртталга оран-савазын тудуп алырынга азы ипотека төлевиринге субсидияны бээр программа ажылдап турар. 2024 чылда «Аныяктарның бизнес төлевилели» база «Социал төлевилел» грант мөөрейлериниң иштинде 16 кижи 2500,0 муң рубльди алган.
Ол ышкаш аныяк сайгарлыкчыларны деткиири-биле, Аныяктар херектериниң талазы-биле яамы Тываның Экономика хөгжүлдезиниң яамызы-биле кады «Тыва Республикага биче болгаш ортумак сайгарлыкчы чоруктуң хөгжүлдези» күрүне программазының күүсекчилери болуп турар. Ук программа езугаар 25 харга чедир 3 бизнес-төлевилелге 1,5 сая рубльге грант акша-хөреңгизин үндүрген: Хоолга төвү, Турисчи бааза болгаш Бот-хандырылга кофейнязы. Мөөрейниң түңнели-биле регионнуң девискээринде сайгарлыкчы чорук сайзырап, чаа ажылчын олуттар немежип турар.
2024 чылда «Россияның аныяктары» федералдыг мөөрейлерге 49 кижи киришкен (2023 чылда 63 чагыгны киирген), оларның 9-у тиилекчи болган (ооң мурнунда чылга деңнээрге, 25 хуу эвээжээн). Ооң чылдагаанындан яамы 2025 чылда Грант төлевилелиниң школазын ажыдар сорулганы салган. Аңаа грант киржикчилеринге методиктиг дузаны көргүзер.
«Аныяктар болгаш уруглар» национал төлевилели
Аныяктар херектериниң талазы-биле федералдыг агентилелдиң ажылдап кылганы «Аныяктар болгаш уруглар» национал төлевилел Россияның девискээринге национал сорулгаларны хөгжүдеринче угланган.
Төлевилелдиң кол сорулгазы – бедик мөзү-бүдүштүг база харыысалгалыг, бот-тускайлаң чорукту хандырып шыдаар, чижилгелиг чорукка белен, Россияның келир үези дээш патриотчу тура-соруктуг аныяк-өскенниң хевирлеттинери болгаш сайзыраары болур.
Национал сорулгазы – кижи бүрүзүнүң күш-шыдалын боттандырып, ооң салым-чаяанын сайзырадыр, социал харыысалгалыг болгаш патриотчу чоруккка кижизидери.
Бо үеде Тываның Аныяктар херектериниң талазы-биле яамызы национал төлевилелдиң 5 регионалдыг программа езугаар ажылдап турар: «Россия – арга-шинектер чурту», «Бис кады бис», «Бүгү эки чүүлдерни уругларга», «Башкылар болгаш дагдыныкчылар», «Профессионалитет». Шупту төлевилелдерде саң-хөөге хамаарышпас дугуржулгаларны чарган.
2025 чылда мурнады хөгжүдер ажылдар
2024 чылдың ажыл-чорудулгазының түңнелдерин өөренип көргеш, Тываның Аныяктар херектериниң талазы-биле яамызы бо чылдың мурнады хөгжүдер сорулгаларын тодараткан. Ол дээрге, бир дугаарында, «Аныяктар болгаш уруглар» национал төлевилелди амыдыралга боттандырары, Грант төлевилели школаны ажыдары, «Аныяктарга регион» федералдыг программага киржип, инфраструктураны сайзырадыры, Улуг Тиилелгениң 80 чылының байырлалын организастаар болгаш белеткээр регионалдыг эки турачыларның штавының хемчеглерин амыдыралга боттандырары, #Бискадыбис регионалдыг штабтың хемчеглерин боттандырары болур.
(Төнчүзү. Эгези 2025 чылдың январь айның үндүрүлгезинде)
Алена НАН-ХОО,
Чуруктар Буян ООРЖАКТЫҢ
