Владислав Ховалыг инфраструктура хөгжүлдезинге культура объектилериниң чаартылгазы эки байдалды тургузуп турарын отчёдунга демдеглээн.

“Өг-бүле” национал төлевилелдиң ачызында Саглыда ном саңының оран-савазынга капитал септелгени чоруткан, Бай-Даг суурда ном саңында болгаш Бора-Тайга суурнуң улусчу театрында септелге ажылы эгелей берген. “Сорунза” губернатор төлевилелиниң акшаландырыышкыны-биле Торгалыг, Дружба суурларда чаа культура бажыңнары туттунган.

Ниитизи-биле республика девискээринде 369 культура болгаш уран чүүлдүң албан черлери ажылдап турар. Ында 3,6 муң ажыг кижи ажылдап турар. Ындыг турбуже культура адырында кадрлар чедишпейн турар –106 ажылчы олут ам-даа хостуг болуп артпышаан. Колдуунда уругларның уран чүүл школаларынга башкылар, концертмейстерлер, уран чүүл удуртукчулары хереглеттинип турар.
Кадрлар чедишпес айтырыгны ведомствонуң “Адрестиг кадрлар белеткели” төлевилелиниң дузазы-биле шиитпирлеп турар. Ол төлевилелдиң ачызында 18 аныяк специалист, 30 студент ат кырында стипендияны ап турар. Дээди өөредилге черлеринче тускай сорулгалыг 17 кижини өөредип чоруткан, 73 кижи училище болгаш колледжтерде өөренип турар. “Көдээниң культура ажылдакчызы” программаның киржикчилери 2025 чылда 13 кижи, 2026 чылда ук программага киржири-биле 27 специалист билдириишкиннерни киирген.

Чурукту ТР-ниң Чазааның парлалга албанындан алган.