Хемчик сумузунуң А. А. Кунзук аттыг школазының музейиниң удуртукчузу Р.Д-С. Чедер-оол Бай-Тайганың ус-шевер хоочуну Сайлык Уртунайны чалап, өөреникчилерге солун, угаадыглыг ужуражылганы эрттиргенин өөредилге чери дыңнаткан.
Алдыгы класстың өөреникчилери, «Музей ажылы» бөлгүмнүң кежигүннери хемчегге идепкейлиг киришкен. Ужуражылганың
темазы «Өг – тыва чоннуң чурттаар оран-савазы».
Аалчы уругларга тыва өгнүң, ооң тургузуунуң онзагайын таныштырган. Тыва өгнүң эт-севин, эдилелдерин салыры мырыңай тускай дүрүмнүг. Ол чурумну 12 чылдыг тыва календарь-биле дүүштүрүп каан. Ону кысказы-биле тодаргайлаарга мындыг:
1. Дөр черге ыяап -ла аптара салыр.
2. Аптара кыдыгларынче орун салыр.
3. Орун бажының дужунга эр улустуң, а дужунда өгнүң кыс ээзи олуду.
4. Аяк-сава, аъш -чем суггар херексел – үлгүүр.
5. Эжик аксы. Ол душка чорумал кижилер олурар. Кыжын хураган, бызаа челелээр.
6. Чыышкын азы чуък адаанда адыр ыяшка аргамчы, кижен, дужак, чүген, чулар, эзер азар.
7. Аъш-чем делгээр чавыс столчугаш – ширээ.
8. Өгнүң дап-дал ортузунда ожук турар.
9. Өгнүң иштинге үш кол ширтек чадар: дөр ширтээ, аай ширтээ, дедир ширтек.
Өг – тыва чоннуң төөгүзү, ооң чарылбас кезээ. Өгбелеривистиң ыдыктыг оран-савазы-дыр.
Школаның коллективи С.М. Уртунайга өөреникчилерге өг дугайында үлегер домактарны, тывызыктарны тыптырып, солун, өөредиглиг ужуражылга- кичээлди эрттирип бергенинге четтиргенин илереткен.
