Ле Ань Миньевич — салым-чаяанныг башкы болгаш өөреникчилериниң сорук киирикчизи, дагдыныкчызы.
Амгы үениң өөредилге адырында аныяк болгаш эрес-шудургу башкылар онза үнелелдиг. Олар өөреникчилериниң хей-аъдын көдүрбүшаан, уругларның сонуургалының аайы-биле угланыышкынын сайзырадырынга дузалаар. Шак-ла ындыг аныяк башкының бирээзи Өвүр кожууннуң Саглы суурунуң школазында ажылдап чоруур физика башкызы — Ле Ань Миньевич.
Быжыг билиг болгаш чедимчелиг башкылаашкын
Ле Ань Миньевич физикада быжыг билииниң база теманы чедимчелиг тайылбырлап билири-биле, бодунуң салым-чаяаныын бадыткаан. Ооң кичээлдери солун болгаш билдингири-биле, өөреникчилерни хаара туткан.
Өөредилгениң чаа аргалары
Башкы өөредилгениң чаа аргаларын кичээлдерде ажыглап турар, ооң иштинде интерактивтиг технологиялар болгаш практиктиг шенелделер кирген. Ол бүгү школачыларның эртемге сонуургалын оттуруп, угаан-бодал сайзырадырынга идиглиг болганы чугаажок.
Кичээлге чүгле теориялыг тайылбыр кылыр эвес, а интерактивтиг технологиялар болгаш практиктиг шенелделерни ажыглаары чугула дээрзин Ле Ань Миньевич демдеглээн. Ынчангаш ооң кичээлдеринде практиктиг шенелделер үезинде уруглар физиктиг кылдынныгларны херек кырында көрүп турар. Ол чүүл эртемни чүгле шиңгээдип алырынга дузалыг эвес, а харын-даа сонуурганчыг болдуруп турар.
Класста эп-найырал
Ле Ань Миньевичтиң база бир чугула талазы — класска эп-найыралдыг байдалды тургузуп билири. Чүгле ынчан өөреникчи бүрүзү бодунга быжыг бүзүрелдиг болур. Шак ындыг байдалда уруглар айтырыг салырындан кортпас, боттарының санал-оналын чугаалап билир, сайгарылгаларга идепкейлиг киржир.
Школа амыдыралынга киржилгези
Аныяк башкы школаның янзы-бүрү хемчеглеринге киржип, харын-даа эртем-шинчилел мөөрейлерин, олимпиадаларны эрттирип турар. Ол чүүл школачыларның физикага сонуургалын оттурар, уругларның шинчилел ажылдарынга арга-дуржулгазын сайзырадыр. Олимпиадаларга киржип тургаш, уруглар командага ажылдаарынга, ажыл-чорудулгазын планнаарынга база бергелерни ажып эртеринге өөренир.
Профессионал өзүлдеже чүткүлү
Ле Ань Миньевич салдынган сорулгазынга доктаавас, кичээлдерни сонуурганчыг, үре-түңнелдиг кылыр дээш чаа-чаа аргаларны дилеп, тып турар. Ол кезээде профессионал өзүлдеже чүткүлдүг.
