Таңды кожууннуң Дүрген сумузунуң чурттакчызы Сайзана Дүгер социал керээге үндезилээн күрүне деткимчезин алгаш, даараныр черни ажыдып алганын чагырга чери дыңнаткан.

Кожуунда күрүне деткимчезиниң ачызында сайгарлыкчы чорук сайзырап, тус черниң чурттакчылары ынак ажыл-херээн ажыдып ап, чаңгыс чер чурттугларынга ачы-дузазын көргүзүп турарлар.

Эгелеп чоруур сайгарлыкчы Хакасияның күрүне университединге инженер-технолог мергежилин чедип алган. Ол күрүне деткимчези-биле дааранырынга ажыглаар дериг-херекселдерни садып алган.

Сайзана Дүгер университетке өөренип турган үезинде Хакасияның VIII регионнар аразының «Профессионал чогаадылга болгаш чогаадылга ажылы» делгелгезинге I чергениң диломунга, XXII регионнар аразының «АРТ ИдеЯ» мөөрейинге I чергениң диломунга төлептиг болуп, шаңналдыг черлерни чаалап ап турган.

Дүргенчилер национал хеп даарадырындан аңгыда, хевин септедир, эде даарадыр дээш чагыгларны хөйү-биле киирип турар.#тмг