Бо атты 50 чыл иштинде 50 катап эвес, чүгле 31 катап тывыскан, азы 19 чыл куруг, ат тывыстынмаан, Хүндүлүг хамаатылар немешпээн. Ол ындыг болур ажырбас. А 1990 чылда хары угда 9 кижиге хүндүлүг атты үлештирипкен бис.
Ат тыпсыры аай-баштыг, алдавас дүрүмнүг. Ону сагыыры албан. Совет Эвилелиниң Маадыры-даа болза, хоорай чагыргазынга, хоорайның бодунга боттуг үлүүн киирбээн хамаатыга «Кызыл хоорайның хүндүлүг хамаатызы» деп атты тыпсып болбас. Ынчангаш үстүнде айыттынган 19 чылдың кырынга хос чылдар ам-даа немежир.
Мен 2019 чылдың март 16-дагы «Шынга» аажок идепкейлиг ашак-кадай ийи хоочун дугайында «Кылганны мактаар, кылбаанны…» деп чүүл үндүрдүм.
Идепкейлиг улус турда,
Идеялар боттаны бээр.
Чоовууртааже тутчуптарга,
Чок-даа чүве тыптып келир.
Идепкейи иттигип, кылыксаазы кыптыгып чоруур бо ийи кырганның аттарын солунга биживээнимде-ле, «Шын» солун эфирже үндүрүптерге, хамык улус дораан танып каапкан. Чаңгыс-ла хүн менче 61 кижи телефоннады.
Кайызы-даа даянгыыштыг болгаш, каттыштыр 170 харлыг бо ийи хоочуннуң ачызында Чаа-Хөлде дуган, Сүме даанда Бурган, Кызылда ужудукчу Кидиспейге тураскаал көстүп келди. База-ла бо ийи хоочуннуң угаадыының, тайылбырының база эвилелчи ажылының түңнелинде, Копту тулчуушкунунуң 4 маадырынга, политиктигрепрессиялардан өлүрткен база 4 баштыңчывыска тураскаалдар Кызыл хоорайывыста тургустунду. Оларның ажылы ам-даа уламчылап турар. Бо бүгүнүң мегелеттинмес херечизи, деткикчизи болгаш киржикчизи болганымда, бо ийи ашак-кадайның кайызынга-даа бо төөгүлүг чылывыста «Хоорайның Хүндүлүг хамаатызы» деп атты хары угда тыпсыр дээн саналымны деткиириңерни диледим. (Ред. Автор саналын 2021 чылда киирген «Шын» 2021.04.03.).
Чооду Кара-Күске
