Тываның Көдээ ажыл-агый яамызы чылдың-на «Агростартап» мөөрейни чорудуп турар. Ол көдээ ажыл-агый адырынга биче болгаш ортумак сайгарлыкчы чорукту сайзырадырынче болгаш «Шынарлыг болгаш чижилгелиг экономика» деп национал төлевилелди боттандырарынче угланган. Бо чылын ол мөөрейни апрель айда эрттирген, аңаа киржири-биле, 142 кижи чагыгны киирген.

Комиссияның 50 хуузунда күрүне албаны-биле харылзаа чок, хамаарылга чок эксперттер кирип турар. Ол ышкаш комиссияга хөй-ниити организацияларының удуртукчуларын, чижээ, Тыва Республиканың дайын­чыларының иелер комитеди, Тускай шериг операциязының хоочуннарының ассоциациязы база шериглерниң «Кара барс» дээн ышкаш организацияларын чалаан.

«Республиканың чурттакчы­ларының гранты­ларга киржир сонуургалы улгатканын көрүп тур бис. Бюджет кызыгаарлыг болганындан шупту чагыг­ларны деткип шыдавас бис, ынчалза-даа эң-не солун төлевилелдерни деткиирин кызыдып турар бис» — деп, ТР-ниң Көдээ ажыл-агый яамызының специалистери дыңнаткан.

Түңнелинде 14 фермер грантыны алган. Оларның аразында 5 кижи ТШО киржик­чизи, 2-зи ТШО киржикчи­лериниң өг-бүлелериниң кежигүннери база 7-зи «Фермерлер школа­зының» доозукчулары. Деткиир төлевилелдерде уксаалыг инектер, хойлар болгаш аъттар өстүрери, ногаа шыгжамырының тудуу база көдээ ажыл-агый техниказын садып алыры кирип турар. Детким­че­ниң ниити түңү 43 сая рубль.

ТР-ниң Көдээ ажыл-агый яамызының медээзи болгаш чуруу.