Кызыл кожууннуң көдээ ажыл-агый эргелелиниң ажылдакчылары сумуларның малчын кыштагларынче удаа-дараа ажыл-агыйжы үнүүшкүннерни кылып турар. Чоокку хүннерде Сукпак сумузунуң чагырга чериниң ажылдакчылары-биле кыштагларже чедип, малдың кышты онча-менди ажары болгаш мал бүрүткелинге хамаарыштыр мониторингини чоруткан.

Көдээ ажыл-агый эргелелиниң специалистери кадарчылар-биле кады мал чеминиң дугайында айтырыгны чугаалашпышаан, малга ветеринарлыг дузаны көргүскен. Малдың хүр-менди кышты ажарынга база бир кол чүүл – мал аарыгларын өй-шаанда илередири деп, малчыннар санап турар.