Тываның көдээ ажыл-агый шөлдеринде суггарылга системазының чаартылгазы уламчылавышаан. Күрүнениң федералдыг бюджет албан чери «Сибирмелиоводхоз» эргелелиниң Тывада салбыры Наадым байырлалында регионче келген ийи суггарылга машиназын ажылдадып, шенеп турар.

Ооң мурнунда чылдарда чаъс барык чагбайн, хөй кезии кааң үелер турган. Ооң уржуундан көдээ ишчилер мал чеми болгаш тараа-быдаа ажаалдазын чогуур деңнелге чорутпаска, кыштаглаашкын нарын эртип турган. Оон аңгыда үер база суггарылга системаларынга улуг когаралды чедирген.

Үер халавындан камга­лаары-биле, Барлык база Алаш суггарылга системаларынга дараазында ажылдарны планнаан: аварийлиг гидротехниктиг тургузугларның септелгези, полимерлиг материалдарны ажыглап тургаш, каналдарны бүрүнү-биле арыглаары, суг дамчыдар тудугларны быжыглаары.

Чаа суггарылга маши­налары – кургаг үеде тараа­чыннарга дузалаар чугула дериг-херексел, ол ышкаш кышты хүр-менди ажып эртериниң барымдаазы.

Тываның Көдээ ажыл-агый болгаш аъш-чем яамызының чуруу.