«Бардо» кинофильмни бо хүн Чебоксарыда бүгү делегей чергелиг кинофестивальга бараалгадып турар. Бо хүн «Чувашкино» күрүнениң киностудиязынга ук кинону чебоксаржылар көөр, а ноябрь 4-түң хүнүнде мөөрейниң жюри кежигүннеринге көргүзер.  Ооң режиссеру Ролан Ооржак дээрзин сагындыраал. Фестивальда ниитизи-биле 35 кинофильмнерни киириштирген. Ону 2 аңгы секцияга чарган – оюн-тоглаалыг кино база этниктиг кино. Этниктиг секцияда тыва кинодан аңгыда, 23 картина фестивальдың кол шаңналы «Анне» дээш демисежир.
«Бардо» фильмни фестивальга Виталий Петров төлээлеп четкен. Ол – сценарийниң автору болгаш продюсер болурундан аңгыда, амгы үеде «Тывамедиабөлүктүң» кол редактору.
«Оон аңгыда оюн-тоглаалыг кино секциязынга 11 кинону киирип турар. Мөөрейде кирип турар 35 кинолардан өске фестивальдың программазындан дашкаар кинофильмнерни база көргүзер. Фестивальдың түңнелин ноябрь 5-те үндүрер» — деп, Виталий Петров  #Тыванын_аныяктары солуннуң штаттан дашкаар корреспондентизинге Чебоксарыдан дамчыткан.

«Бардо» бүгү делегей чергелиг прокатче үнген баштайгы тыва кино дээрзин сагындыраал. Ону делегейниң 16 чурттарының  ivi.ru, megogo, Tvzavr онлайн-кинотеатрларынга көрүп болур.

Алена НАН-ХОО

#фильм_Бардо#тувинский_фильм#Бардо#международный_кинофестиваль#новоститывы #тыванын_аныяктары_сылдысчыгаш_солуннар