Сентябрь айның 7-10 хүннеринде регионнар аразының этниктиг езу-чаңчылдары болгаш байырлалдарының «Азия төвүнге ужуражылгалар» фестивалы болуп эртер. Ол Россияда чоннарның культурлуг өнчүзү чылынга тураскааттынган.

Фестивальга чогаадыкчы бөлүктер, Тываның болгаш Сибирьниң улусчу чогаадылга коллективтери, улусчу ус-дарганнар, уран-шеверлер киржир. Ооң программазында «Уран-шеверлер хоорайжыгажы» делгелге-ярмарка, Тывада диаспораларның, землячестволарның таныжылгазы, «Чоннуң тывызыктыг чажыды» этниктиг езулалдар көрүлдези, «Чоннарның найыралдыг өг-бүлези» байырлыг концерт, эртем-практиктиг конференция, «Сибирьниң байырлалдары» этнобайырлал база «Янзы-бүрү дылдарга диңмирээл!» этнодискотека кирип турар. Фестивальды Республиканың улусчу чогаадылга бажыңының коллективи база «Онза» хөй-ниити организациязы эрттирер.

«Азия төвүнге ужуражылгалар» фестивальды Россияның культура фондузунуң деткимчези-биле организастап турар. Оон аңгыда фестивальдың партнерлары кылдыр Тываның нациялар херээниң талазы-биле агентилели, Сибирьниң улусчу чогаадылга төптериниң болгаш бажыңнарының ассоциациязы, Якутияның Улусчу чогаадылга төвү, Тываның гуманитарлыг болгаш социал-экономиктиг шинчилелдер институду, «Тывамедиабөлүк» ИА кирип турар.

«Онза» хөй-ниити организациязының медээзинден Мира КОНГУЛ-ООЛ белеткээн.