Июнь 24-26 хүннеринде Кызылга V Делегей чергелиг “Азий диптиң төвүнде фанфарлар-2025” үрер хөгжүм оркестрлериниң фестивалы болур. Бо чылын ону РФ-тиң Камгалал яамызының болгаш ТР-ниң Чазааның деткимчези-биле Ада-чурттуң Улуг дайынынга Тиилелгениң 80 чыл оюнга тураскаадып эрттирер. Фестивальга Казахстан, Моолдан болгаш Россияның регионнарындан үрер хөгжүм оркестрлери, хөгжүмчүлер, солистер киржир.

ТР-ниң Чазааның Т. Дулуш аттыг үрер хөгжүм оркестриниң эгелээшкини-биле болур фестивальдың уран чүүл удуртукчузу РФ-тиң Чепсектиг күштериниң шериг оркестрлер албанының даргазы, кол шериг дирижёру, генерал-майор, Россияның алдарлыг артизи Тимофей Маякин.
Фестивальдың байырлыг ажыдыышкынын 1945 чылдың июнь 24-те Москваның Кызыл шөлүнге болган Тиилелгениң Парадынга тураскаадып эрттирер.
“Азий диптиң төвүнде фанфарлар-2025” фестивальдың хемчеглери: Тиилелге шөлүнге Мөңге отка чечек салыр ёзулал, фестиваль киржикчилериниң плац-концерттери болур. База бир онзагай чүүл. ТР-ниң Чазааның Т. Дулуш аттыг үрер хөгжүм оркестриниң үделгези-биле Казах ССР-ниң улустуң артизи Роза Рымбаева концерт көргүзер. Оон аңгыда Арат шөлүнге фестиваль киржикчилери боттарының солун программазын, үрер хөгжүм оркестрлериниң каттышкан оюн-көргүзүүн көрүкчүлерге бараалгадыр. Бир эвес агаар-бойдустуң чылдагааны-биле таарымча чок байдалдар тургустунуп кээр болза, бүгү көрүлде Тываның В.Көк-оол аттыг Национал театрынга болурун организакчылар дыңнадып турар.
Фестивальдың шупту хемчеглери көрүкчүлерге халас!

Чурукту интернеттен алган.