Президентиниң культурлуг эгелээшкиннериниң грантызын тиилээн төлевилел езугаар Тывада Степан Сарыг-оолдуң чогаалынга үндезилеттинген долу метражтыг “Аңгыр-оолдуң тоожузу” деп фильмни тырттырган.
Ооң баштайгы көрүлдези ноябрь айда болур. Фильмниң режиссёрлары, бистиң чаңгыс чер чурттугларывыс, кинематографтар, делегей чергелиг кино фестивальдарының лауреаттары – Виталий Петров биле Ролан Ооржак. А ооң кол ролюн ыраккы Каа-Хем суурнуң школазының 7-ги классчызы Дидим-оол Даржай ойнаан.
Дидим-оолдуң ачазы база уран чүүл-биле харылзаалыг, Артыш Даржай – хөгжүм-шии театрының артизи, а авазы Айдана – «Звездочка» уруглар садында ажылдакчы. Өг-бүле үш уруглуг, Дидим-оолдуң улуг угбазы Адэлайдэ база бичии кыс дуңмазы Мандираа бар.
Дидим-оол ачазы ышкаш уран чүүлге сундулуг, тергиин эки өөредилгеден аңгыда, ол хөгжүм кичээлдеринче барып турар. Улаштыр хөөмей бөлгүмүнче бижиттирип алыр күзелдиг. Ындыг-даа болза ол, өске бүгү элээди оолдар ышкаш, шимченгир оюннарга ынак. Хол бөмбүүн сонуургаар. Бо бүгү чүүлдерден аңгыда, ол «Эврика» немелде өөредилге төвүнде журналистика болгаш актёрнуң уран аргаларында өөренип турар.
Актёрнуң уран аргалары «Аңгыр-оолдуң тоожузу» фильмниң шилилгезин эртеринге онза дузалаан. Ынчалза-даа бичии актёрнуң чугаазы-биле алырга, тыва дылды эки билири шилилгени эртеринге, ооң талазынче деңзини чая баскан. Аныяк ада-ие уруг-дарыынга тыва чоннуң чаагай чаңчылдарын өөредип, бажыңынга чүгле төрээн дылынга чугаалажырын дугурушкан.
Оон аңгыда кинону оолдуң төрээн чурту – Өвүр кожууннуң девискээринге тырттырганы бүзүрелди немээн.
Фильмни ТАР-ның ССРЭ-ге каттышканының 80 чыл оюнга тураскаатканын сагындыраал.
ТуваМедиаГрупп материалындан Алена Нан-Хоо очулдурган.
Чуруктар Артыш Даржайның хууда архивинден база Тывамедиабөлүктүң
