«Тываның аныяктары чугаалап тур!» дамчыдылганың аалчызы – Буян Мылдык.
— Бөгүн бистиң аалчывыс – театр болгаш танцы, балет артизи Буян Мылдык. Чаңчыл езугаар бирги айтырыывыс: боттарыңарны таныштырып көрүңерем.
— Кызылга төрүттүнген мен. Хоорайның 7 дугаар школазын дооскаш, эрге-хоойлу талазынче өөренип кирген мен. Ону чедир өөренмейн, Кызылдың уран чүүл колледжизинче кирген мен. Хореография салбырын өөренип дооскаш, «Саяннарже» ажылдап кирдим. Ооң соонда бот-өөредилге-биле «ВСГИК»-тиң дипломун холга алдым. Ам-даа улаштыр магистратураже өөренир күзелим бар. Амгы үеде хөгжүм болгаш танцы таетрында ажылдавышаан, брейк дансты танцылап тур мен. Мээң танцыга сонуургалым 6-7 класстарда брейк данстан эгелээн.
Авам полицияга ажылдап чораан, ачам – эмчи. Бодум Новосибирск хоорайга шериг албан-хүлээлгем эрттирген мен. Хостуг үемде кештен кылыгларны чагыг езугаар ап, ону садып-саарып турар мен.
— Тренериңер кым турганыл? Каяа белеткенип турдуңар?
— Ынчан дыка хөй оолдар брейк дансты сонуургап турган бис. Баштай школавыска, кудумчуга-даа танцылап турдувус. Мөөрейлерге киржип эгелээривиске, эживистиң авазы уштап-баштап турган. Оон чоорту Ярыгинге бөлгүмче барып эгелээн бис.
— Стартинейджер мөөрейлеринге киржип турдуңар бе?
— Мен Стартинейджерге таварышпаан мен. Мэрниң кубогу деп маргылдааларга киришкилээн бис.
— Брейк данстан балетче канчап шилчий бергениңер ол?
— Чогум шуут-ла балет база эвес. Национал танцылар. Красноярскыже өөренип кирип тургаш, ында брейк данс аажок сайзыраңгай деп билир турган мен. Ынчангаш өөредилгем-биле чергелештир хостуг үемде брейк дансты уламчылаар сорулгалыг турдум.
Ынчалза-даа ындыг амыр эвес болган, өөредилгем баксырап эгелээн. Ректор авамче долгааш, мээң багай өөредилгемни дыңнаткан. Ынчан документилеримни алгаш, Кызылдың уран чүүл колледжизинче кирип алган мен.
— Амыдыралыңарда дөмей-ле танцыга чедип келген ышкажыл силер. Колледжке өөренип турган үеңерни таныштырып көрүңерем.
— Меңээ баштай анаа-ла кудумчудан чедип келгеш, танцы «станогунуң» артынга туруптары берге болган. Балеттерниң чуга хептеринге, чешкаларынга база таарзынмаан мен. Ынчалдыр 1 чыл эрте берген. Оон меңээ шериг албан-хүлээлге эртериниң дугайында дыңнадыг келген.
— Шериг соонда катап-ла уран чүүл колледжизинге келдиңер бе?
— Ийе, баштай шеригге тургаш, чартык чыл хире хореографияже дедир келбес боор мен деп бодап турдум. Ооң соонда, чартык чыл эрткенде, колледжте кураторумже долгааш, катап өөренирин дугуржуп алган мен. Ынчалдыр шериг соонда, колледжке өөредилгем уламчылааш, национал танцыларга сонуургалым оттуп келген.
Бир дугаар гастрольдааным база улуг рольду ойнаан. Уфага хөй-хөй чоннарның массалыг танцы-самын көргеш, ооң кайгамчык чаражын эскерип көрген мен. Чоннарның танцылары дыка улуг ужур-дузалыг болур: чижээлээрге, «Эзирниң самын» алыр болза, ону күүседип тургаш, кижиниң иштики сагыш-сеткили, хей-аъды көдүрлүр.
Алена НАН-ХОО белеткээн
хууда чуруктар
