Апрель 15-те, 17.00 шакта, Улусчу чогаадылга бажыңынга «Байлак Тывам эртинези» гала-концерт болур. Аңаа «Улусчу» база «Үлегерлиг» деп аттарлыг чогаадыкчы коллективтер киржир. Бо чылын көрүлде 2 аңгы угланыышкынныг эрткен: «Чаңчылдар» болгаш «Культура дээрге бис-тир бис!».

Бирги угланыышкынга улусчу хөгжүм, улустуң ырлары, улустуң самы, аас чогаалы езугаар ажылдап чоруур коллективтер киришкен. А ийигизинге – театр, хореография, академиктиг хор, вокал-хор уран чүүлү, үрер хөгжүм. Ниитизи-биле көрүлде-мөөрейге 17 коллектив киришкен. Шилилде чаданың соонда, кожууннардан 10 программа гала-концертче кирген.