Светлана Ондар — аныяк шүлүкчү, Тываның чогаалчылар эвилелиниң кежигүнү база Россияның чогаалчылар эвилелиниң кежигүнү.
Бичии уругларга чогаал бижиири амыр эвес, ону чүгле чаштар-биле деңге өөрүп-хөглеп, оларның караа-биле көрүп билир кижи бижиир.
Ол — үш номнуң автору: «Тывыңарам, кымыл бо?», «Мои большие друзья», «Өңгүр өңнер». Светлана Ондар Илья Топоев чогаалчының «Черниң чаяан өзүмнери» — «Чир-чайаа­ным озімнер» хакас дылдан тыва дылче очулдурган. Светлананың шүлүктери чүгле Тывада эвес, а Россия иштинде сеткүүлдерде парлаттынган. Ооң чогаалдары бичии чаштарга өөредиглиг болуп турар.Анай
Кулактары халбың-халбың,
Кудурукчуу хочуң-хочуң.
Мочурга дег чараш-чараш,
Мончуктары саглаң-саглаң.

Хураганнар эдертипкеш,
Куураңнадып салчып турар.
Авазы ээп келген болза,
Амырааштың, «Маа-ма!» —
дептер.
Дешкилектеп шурап-маңнаар,
Тенектенип ойнагылаар,
Херим, кажаа, хая кырлаар,
Хензигбейниң ады кымыл?

Челээш чурууйн

Хөл дег чараш ак-көк дээрде
Хөвең ышкаш хоюг чымчак
Хөй-ле булут салдап чору.
Көрүп, тудуп, суйбазымза.

Чаъстыг булут эртип чыда,
Чаданы бээр бадырып көр.
Чечектер дег өңгүр чараш
Чеди кожаа челээш чурууйн.