Кызыл хоорайда чурттап чоруур Аяс Николаевич биле Саяна Эрес-ооловна Баян-оолдар — үлегерлиг ада-ие. Аяс Николаевич – амгы үеде «Маралхоз» КХН-де улуг технолог база ТывКУ-да башкы, а өгнүң херээжен ээзи Саяна Эрес-ооловна республиканың 1 дугаар эмнелгезиниң эндокринология төвүнде эмчи сестразы болуп ажылдап чоруур. Олар бир оолдуг, бир кыстыг.

Оглу Чингис – Росгвардияның ажылдакчызы, а уруу Ай-кыс ачазының изин истеп, ТывКУ-нуң көдээ ажыл-агый факультединде башкы кылдыр ажылдап эгелээн.

Аяс биле Саяна Баян-оолдар үш оол, бир кыс уйнуктарлыг. Кайызының-даа ада-иези мал-маган тудуп чораан, ынчангаш ада-өгбезиниң угун салгап, Баян-оолдарның өг-бүлези база Сесерлигде малчын турлагны тудуп, ажы-төлүн, уйнуктарын күш-ажылга кижизидип чоруурлар.

«Черле мээң ада-ием-даа, өөм иштиниң улузу-даа мал-маганны бо хүнге чедир азырап чоруур. Азыраан мал-маганывыстан эът, сүттү болбаазырадып, тыва аъш-чемни кылып, уруг-дарыывыс хоорайда чурттап чоруур-даа болза, күш-ажылга өөредип чоруур бис» — деп, өг-бүлениң эр ээзи Аяс Баян-оол чугаалаан.

Мира Конгул-оол.
Өг-бүлениң архивинден чуруктарны алган.