Өг-бүлениң эр ээзи Роман Кадыг-Хаяевич Лакпа үр чылдар дургузунда Каа-Хем кожууннуң культура эргелелинде чолаачы болуп ажылдап чоруур. Өгнүң херээжен ээзи Валентина Владимировна Лакпа – Сарыг-СептиңҢ 2 дугаар школазында педагог-библиотекарь.
Валентина Владимировнаның өг-бүлези башкылар династиязындан үнген, салгалдан салгалче уругларга быжыг билигни болгаш ёзу-чаңчылдарны дамчыдып берип чоруур. Лагбыр Узуновна, Валентина Владимировнаның авазы, эге класстар башкызы, башкылаашкын шугумунда 40 чыл ажыл стажтыг. Ол Каа-Хем кожууннуң өөредилге адырының сайзыралынче улуг үлүг-хуузун киирген. Хөй-хөй шаңналдарның, хөрек демдектериниң, алдарлыг аттарның эдилекчизи. Уруу Шенне Романовна – Сарыг-Септиң 2 дугаар школазында орус дыл болгаш литература башкызы. База бир уруу Роланда Романовна – кожууннуң төп эмнелгезинде эмчи сестразы.
Лакпаларның өг-бүлези күш-ажылгыры, мергежилинге бердингени, өг-бүлениң ыдыктарын сагып чорууру-биле үлегерлиг.
Каа-Хем кожууннуң медээзинден Мира Конгул-оол белеткээн.
Кожуун чагыргазының чуруу.
