Тываның Чазаанга регионнуң Баштыңы Владислав Ховалыгның удуртулгазы-биле, онза байдалдарны болдурбас болгаш чайладыр база өртке удур айыыл чок чорукту хандырар талазы-биле республика комиссиязының ээлчег чок хуралы болуп эрткен. Комиссия кежигүннери республикада арга-арыг өрттериниң байдалын сайгарып көргеш, байдалды чавырылдырарының элээн каш шиитпирлерин хүлээп алганнар. Арга-арыг өрттериниң байдалының нарыыдап турары-биле холбаштыр регионга онза байдалды июль 29-та киирген.
Июль 30-ниң эртенги үезинде, ниитизи-биле 917 гектар шөлдүг арга-арыгда 23 өрт хып турганын Тываның арга-арыг болгаш бойдус ажыглалының сайыды Григорий Ондар дыңнаткан. Бир өрттү өжүрген. Сөөлгү хүнде ийи өрт өжүртүнген. Арга-арыг өрттерин өжүреринче 232 кижи база 31 санныг техниканы хаара туткан. Оон аңгыда чүгле самолет-биле чедип болур тайга-даксыл черлерде беш өрт хыппышаан. Агаар-бойдустуң байдалы-биле ол участоктарже өртчүлер бөлүктерин ынаар октаары болдунмас.
Хакас Республиканың Абакан курлавырының агаардан арга-арыг камгалалының 33 кижиден тургустунган десант-өртчүлер командазы арга-арыг өрттерин өжүреринге дузалажыр дээш, дүүн республикада чедип келген. Красноярск крайдан, Омск областан база Бурятиядан өртке удур агаар-десант бөлүктери келир ужурлуг.
Тываның арга-арыг камгалаар авиаотрядының Ми-8 вертоледу өртчүлер бөлүктерин аай-дедир чедиреринге дузалажып турар. Командаларның шимчээшкинин дүргедедери-биле, Россияның ОБЯ-зының болгаш Россияның Камгалал яамызының самолеттарын немей дилээн. Булуттардан чаъс чагдырар тускай дериг-херексел-биле чепсегленген АН-26 самолетту өрттерге удур ажыглаарының аргаларын база чугаалашкан.
Комиссия кежигүннери байдалды чавырылдырар дээш элээн каш кол шиитпирлерни хүлээп алган. Ылаңгыя, муниципалдыг тургузуглар өртке удур эки турачы дружиналар база эки турачы улусчу бригадалар санын көвүдедип тургаш, өрт өжүрер күштерни болгаш курлавырларны мөөңнээр. Арга-арыг ажыл-агыйлары полиция килдистери-биле кады, арга-арыг девискээрлеринче кирер черлерге постуларны тургузуп, хайгааралды күштелдирерин дааскан.
Республиканың Баштыңы Владислав Ховалыг харыысалгалыг ведомстволарга онза байдал үезинде арга-арыгже баарын хораанының дугайында чонга дыңнадырынче онза кичээнгейни углаарын дааскан. Чурум үрекчилеринге онааштыр административтиг хемчеглер шыңгыыраан дугайында медээлерни тарадыр.
Владислав Ховалыг социал четкилерде бодунуң блогунда, сиген кезилдезиниң, кат-тоорук чыылдазының үезинде, отка хамаарыштыр харыысалгалыг болурунче республиканың чурттакчыларын кыйгырган.
Бир эвес арга-арыг өрттерин көрүп кагзыңарза, 112 дугаарлыг чаңгыс аай дугаарже азы регионалдыг диспетчер албанының 8-(39422)-5-04-86 дугаарлыг телефонунче дыңнадып болур.
