Чаа чылдың байырлалын уруглар четтикпейн манап турар. Бо чылын школаның өөреникчилери чурттуң иштинде чарлаттынган «Күзелдер шивизи» акцияга киржир күзелин илереткенин Кызылдың 9 дугаар гимназиязының башкылары дыңнаткан.

Шораана Оюн, директорнуң кижизидилге талазы-биле чөвүлекчизи:

— Эге болгаш улуг класстарның өөреникчилери бо чылын «Күзелдер шивизи» акцияга киржирин илередип турар. Уруглар боттарының күзелдерин бижип, акцияда киржип эгелээн. Бо удаада оолдар, уругларның күзелдери онзагай. Олар чүгле материалдыг бир-ле чүүлдү белекке алырынче эвес, а делегейге тайбыңны күзеп, хоорайының арыг агаарының дугайында бижигилээн.

Дыка хөй өөреникчилерниң ачалары, акылары, даайлары төрээн чуртун камгалап, тускай шериг операциязында киржип турар. Уруглар, оолдар Чаа чылдың байырлалын уткуштур «Солдатка чагааны» организастап, чоок кижилеринге, чаңгыс чер чурттугларывыска байыр чедирген чагааларны бижиир сорулгалыг. Чаа чылдың хуулгаазынынга бүзүреп, идегеп, бис база өөреникчилеривис-биле деңге делегейге амыр-тайбыңны күзеп турар бис.

Школавыстың өөреникчилеринге, уруглар, оолдарга, оларның күзелдери бүдер болзунам деп йөрээп каалыңар! Чаа чылга чедир акцияга идепкейлиг киржириңерни күзедим!

Алтея Күжүгет, 9 «а» класстың өөреникчизи:

— Бистиң чуртувуста база делегейде шупту кижилерге аас-кежикти, кадыкшылды Чаа чылдың байырлалын таварыштыр күзээр-дир мен. Республикавыс ам-даа сайзырап, чаа-чаа оран-савалар туттунуп, улуг улустарга чаа-чаа ажылчын олуттар немежир болзун. А бистер школавысты чедиишкинниг дооскаш, дээди эртемни чедип алган соонда, төрээн чуртувустуң сайзыралы дээш кызымаккай ажылдаар бис.

Ам бо үеде алыр болза, чаңгысклассчым Найырга моон-даа соңгаар спортчу чедиишкиннерни күзедим.

Мира КОНГУЛ-ООЛ белеткээн.

Чурукту социал четкилерден алган