«Движение Первых» уругларның болгаш аныяктарның хөй-ниити шимчээшкининиң IV съездизиниң ажылынга Тывадан төлээлер киришкен. Бистиң регионувустан делегацияны Баштайгыларның регионалдыг салбырының Чөвүлел даргазы Эртине Куулар баштаан. Тывадан төлээлерни регионалдыг салбырның ниити хуралынга бадылаанын сагындыраал. Оларга школачылар Ай-Хаан Монгуш, Батаа Санчат, Дамба Монгуш, Байлак Монгуш, ТывКУ-нуң төөгү факультединиң студентизи Чайынды Мартый-оол база Тожу кожууннуң Тоора-Хем школазының аныяк башкызы Чаян Хертек хамааржыр.
Ук хемчег Москва хоорайга «Россия» национал төпке болуп эрткен. Аңаа чурттуң 89 регионундан ийи муң ажыг кижи киришкен.
Баштайгыларның IV съездизин Россияның Президентизи Владимир Путин ажыткан. Чурттуң Президентизи Баштайгылар шимчээшкининиң амгы үениң аныяк-өскениниң кижизидилгезинде улуг үлүг-хуузун киирип турарын демдеглээн.
«Шимчээшкинниң база бир кол сорулгаларының бирээзи – аныяк-өскенниң амыдыралга туружун тып алырынга дузалаары. Чуртталгада бодунуң оруун, бүгү назынын бараалгадырынга белен хире бодунуң херээн тып алыры чугула. Баштайгыларның шимчээшкинин бар талазында ол дээш база тургускан» — деп, Владимир путин демдеглээн.
Шимчээшкинниң кежигүннери чыл санында немежип турар, амгы үеде оларның саны 11 сая кижи четкен. Аныяктар ортузунга актуалдыг айтырыгларны шиитпирлээри-биле, шимчээшкин кижизидилгениң системажыттынган ниитилел-күрүнениң институду кылдыр тургустунар ужурлуг.
Оон аңгыда Владимир Путин Шимчээшкинниң Хайгаарал чөвүлелиниң хуралын эрттирген болгаш, аңаа чугула айтырыгларны сайгарып чугаалашкан. Чурттуң удуртукчузу ада-иелер, дагдыныкчылар, школачылар-биле чугаалашкан. Оларның аразында Тываның төлээзи, Чадаана хоорайның 1 дугаар школазының кижизидилге талазы-биле чөвүлекчизи Буян-Билэг Ооржак бар. Бистиң чаңгыс чер чурттуувус Президентиге бодунуң ажыл-ижин, төөгүзүн таныштырган.
Мира Конгул-оол белеткээн.
Долузу-биле «Тываның аныяктары» солуннуң апрель айда үндүрүлгезинден номчуп болур.
Чуруктар Движение Первых | Тыва
