Интернет четкизиниң дузазы-биле кижилер делегейниң ужу-кыдыында чурттарда эш-өөрү, чоок улузу-биле харылзажыр аргалыг, ооң-биле чергелештир ырактан өөренип, ажылдап-даа болур. Ынчалза-даа Интернеттиң сайзырааны-биле, бузурукчулар кайы көвүдээн.

Каа-Хем район судунуң ажылдакчылары Кызыл хоорайның 30 харлыг чурттакчызынга хамаарыштыр кеземче херээн өөренип көрген. Ол Интернет таварыштыр чурттакчы чонга мебельди өске хоорайдан садып эккеп бээрин саналлдап турган.

Когараан херээжен кижи бараан дээш акшазын шилчидип бээрге, бузурукчу элээн үе эрткенде, Сарыг-Сеп суурже чедиргени дээш, немей акша шилчидерин дилээн. Кажан акша-хөреңги ооң агар санынче кирип кээрге, ол харылзааже үнмейн барган. Когараан кижи мебель-даа, акша-даа чок арткан.

Бузурукчу когараан кижиге акшазын эгиткени-биле, 30 муң акшага торгаалды онаагаш, кеземче херээн соксаткан.

Каа-Хем район судунуң материалындан Мира Конгул-оол белеткээн.
Чурукту социал четкилерден алган