Улуг Тиилелгениң 80 чыл оюнга тураскааттынган «Ворошилов адыгжызы» бүгү Россияның чаш-элээдилер турнириниң регионалдыг чадазы эрткен. Аңаа республиканың аңгы-аңгы школаларындан 14 команда киришкен. Киржикчилер пневматиктиг винтовкадан часпас адарынга, гранатаны ырадыр октаарынга маргышкан. Маргылдаада чогаадыкчы чада база кирген.

«Турнирниң кол сорулгазы – чүгле часпас адыгжыларны илередир эвес, а боодалга спортун аныяктар ортузунга нептередири. Элээди спортчулар ортузунда ук маргылдаа чугула болуушкун болуп артпышаан, республикада чаа спортчу чаңчылдарны хевирлээринге үлүг-хуузун киирип турар» — деп, «Юнармия» регионалдыг штабтың удуртукчузу Айдын Шивидек демдеглээн.

Чидиг маргылдааның түңнелинде элээди оолдар ортузунга бирги черни Кара-Хөл школазының өөреникчизи Аңчы Хертек, уруглар ортузунга бирги черни Кызыл хоорайның 1 дугаар школазының өөреникчизи Угулза Донгак ээлээн. Ийиги черлерни Шагаан-Арыгның 1 дугаар школазындан Ачыты Данзы-Белек база Бурен-Аксы школазындан Сай-Хоо Дозума тус-тузунда чаалап алганнар. Үшкү черлерге Ак-Дуруг школазының өөреникчизи Тамерлан Чамыян база Кызыл хоорайның 8 дугаар школазының өөреникчизи Ай-кыс Монгуш төлептиг болганнар.

Тиилекчилерге «Артек» уругларның дыштанылга төвүнче путевка, адын сиилбээн кубоктар, «Ворошиловтуң элээди адыгжызы» хөрек демдээ, өртектиг белектер база Тываның Өөредилге яамызының, ТР-ниң «Юнармия» регионалдыг штабтың грамоталарын тывыскан.

Өөредилге яамызының медээзинден Мира Конгул-оол белеткээн.
Чуруктарны социал четкилерден алган.