«Тиилелгениң эки турачылары» Бүгү-россияның хөй-ниити шимчээшкининиң Тывада регионалдыг салбырының волонтёрлары-биле таныжаалыңар.

Виктория Салчак – Кызыл хоорайның 17 дугаар школазының өөреникчизи. Ол эки турачы ажыл-чорудулгада эрткен чылдың апрель айдан бээр киржип турар. Оон бээр янзы-бүрү социал төлевилелдерниң идепкейлиг киржикчизи апарган. Виктория ачы-дуза акцияларынга, экологтуг хемчеглерге киржип, хоорайның чаагайжыдылгазынга үлүг-хуузун киирген. Эки турачы ажыл-чорудулгадан аңгыда, ол чуруурунга ынак, журналистиканы сонуургаар, спортка хандыкшылдыг, аъш-чем кылыр. Диистерге кедергей ынак.

Виктория Салчак: «Бүгү талалыг сайзыраары чугула, бодунуң сонуургалдарынга үени тывар. Эки турачы чорук – чүг­ле кижилерге ачы-дуза чедирери эвес, а бот-өзүлдениң бир аргазы, кижилер-биле чугаалажып, таныжар хевир. Ол солун ужуралдар-биле долган арга-дуржулга, долгандыр делегейни билип алырынга дузалаар. Ол ышкаш кижиниң эки талаже тургустунуп хевирлеттинеринге үлүг-хуулуг. Ынчангаш эки турачы кылдыр ам-даа өзүп, кижилерге ачы-дуза чедирерин уламчылаар мен».

Даваа Шинин – Тываның политехниктиг техникумунуң ийиги курсчузу. Ол бирги курска өөренип тургаш-ла, волонтёрлар шимчээшкининиң идепкейжизи апарган. Тываның Баштайгылары-биле кады гуманитарлыг дуза чыырынга киришкен. Оон чоорту «Тии­лелгениң эки турачылары» хөй-ниити шимчээшкинниң эки турачызы кылдыр ажылдап эгелээн. Ол шилилгезин часпаан. Хөй-ниитижи, эки турачы ажыл-чорудулгазы дээш Аныяктар херектериниң талазы-биле яамызындан, «Тии­лелгениң эки турачылары» хөй-ниити шимчээшкинниң, регионнуң парламентизинден база Тыва Республиканың Баштыңындан хөй-хөй шаңнал-макталдарга төлептиг болган.

Күдерек Нажик Тываның кадеттер корпузунда өөренип турар. Хостуг үезинде хол бөмбүү база баскетбол ойнаарынга ынак. Ооң эң-не ыдык күзели – делегейни дескиндир аян-чорук кылып, янзы-бүрү чоннарның культуразын билип алыры. Он алды харлыынга чедир ол Россияның дыка хөй хоорайларынга четкен, Москва хоорайга «МЫВМЕСТЕ» бүгү делегейниң шуулганынга киришкен, «Орленок» Бүгү-россияның уруглар төвүнге дыштанган, «Артек» Бүгү-делегейниң уруглар төвүнге четкен. Ол ышкаш Иркутск хоо­райга болуп эрткен «Зарница 2.0» шериг-патриотчу оюннуң киржикчизи.

«Волонтёры Победы» бөлүктен Мира КОНГУЛ-ООЛ белеткээн.

#80летпобеды