«Маадыр ие» атка төлептиг болган чаңгыс чер чурттуувус Айнааш Ондарга Тываның Баштыңы Владислав Ховалыг байыр чедирген.

Владислав Ховалыг, Тываның Баштыңы:

— Чаңгыс чер чурттуувус Айнааш Владимировна Ондарның «Маадыр ие» атты алганы-биле байыр чедирип тур мен. Ол Россияның Президентизи Владимир Путинниң бедик атты тывыскан бүдүн чурттуң иштинде 13 аваның санынче кирген. Ооң мурнунда, 2022 чылда, Айнааш Владимировна «Тываның Маадир иези» атка төлептиг болган.

Айнааш Владимировна Ондар – хөй уруг-дарыглыг үлегерлиг ава. Ол 11 ажы-төлдү божаан. Өөнүң ээзи, тускай шериг операциязының киржикчизи Олимпий Алексеевич Монгуш-биле кады уруг-дарыын төлептии-биле кижизидип чоруурлар. Оларның улуг оглу Зоригто – тускай шериг операциязының киржикчизи, дайын хоочуну. «Суворов» аттыг медаль-биле шаңнаткан.

Хөй уруг-дарыглыг болуп, бажыңның төнчү чок шүүдээшкиннери турза-даа, Айнааш Владимировна – хөй-ниити ажылдарының киржикчизи. «Бүгү Россияның Херээженнер эвилели – Россияның идегели» организацияның кежигүнү. Ооң чедиишкиннери дээш өөрүп тур мен. Ондар-Монгуштарның хөй санныг өг-бүлезинге кадыкшылды болгаш аас-кежикти күзеп тур мен».

Алена Нан-Хоо.
Чурукту социал четкилерден алган.