Амгы үеде уруг бүрүзүнге шынарлыг өөредилгени чедип алырынга таарымчалыг байдалдарны өөредилге системазы кол сорулгазы болдурган. Школачының ниити сайзыралы, мергежил чедип алыры, чогаадыкчы чоруу, күш-шыдал сайзыралы, кадык амыдырал, эртем бүрүзүн бедик деңнелге өөредири дээн ышкаш айтырыглар башкының мурнунда салдынган.

Башкылаашкын ажылының база бир кол аргаларының бирээзи – уруг бүрүзүнүң онзагайын көрбүшаан, индивидуалдыг өөредири болур.

Сан кичээлинде, логика болгаш ылаптыг саннаашкын акцентизинче угланган эртемде, индивидуалдыг өөредилге школачыларның деңнелин бедидер болгаш сонуургалын оттурар. Ындыг болганда Кызыл хоорайның 4 школазында дистанциялыг өөредилге төвүнде хаара туттунган уругларны индивидуалдыг өөредир аргаларны ажыглап турар мен.

Кадыкшылының аайы-биле харык-шинээ кызыгаарлыг уруглар болганда, кижи бүрүзү онзагай талаларлыг. Өөреникчи бүрүзү тускай логика, сонуургалдыг, негелделиг болгаш социумга бодун алдынары база тускай. Ынчангаш индивидуалдыг онзагайларны өөредилге, кижизидилге ажыл-чорудулгазының үезинде кичээнгейге алыры чугула. Назы-хар аайы-биле сайзыралында онзагайларны база өөренип көөр. Уругнуң угаан-бодал сайзыралы колдуунда бичии база элээди үеде эки болур. Ынчангаш уругларның ол үезинде эки өөретпеске, улаштыр өөредири нарын апаар. Ооң-биле чергелештир школачының индивидуалдыг онзагайларын, назы-харын кичээнгейге албаска, билигниң шынары үре-түңнел чок болуру чугаажок.

Светлана Анай-ооловна Ондар, Кызыл хоорайның 4 дугаар школазының дистанциялыг төвүнде математика башкызы

Чурукту Интернеттен алган