Бөгүн ТКУ-нуң төөгү, археология болгаш документоведение факультединиң «А.Ч. Ашак-оол аттыг Төп Азия чоннарының материалдыг культуразы болгаш төөгүзү» музейге «Тыва археологияның чугула чадалары: шинчилелдерниң 110 чылы» делгелге болуп эрткен. Делгелге «Ада-чурттуң төөгүзү» фондунуң деткимчези-биле эрттирип турар. Ол ышкаш ТКУ-нуң төөгү факультеди кол организакчылары болганы чугаажок. Ооң удуртукчузу, төөгү эртемнериниң кандидады, доцент Татьяна Люндуп делгелгениң дугайында таныштырган.
Татьяна Люндуп, төөгү эртемнериниң кандидады, доцент, делгелгениң организакчызы:
— Бөгүн «Ада-чурттуң төөгүзү» фондунуң деткимчези-биле делгелгени эрттирип турар бис. Ону музейниң үндезилекчизи, төөгү эртемнериниң кандидады Андрей Чолдак-оолович Ашак-оолдуң чырык адынга тураскааткан. Делгелге 5 кезектен тургустунган. Бирги кезээнде Тываның археологтуг тураскаалдарының XlX чүс чылдың төнчүзүнде база XX чүс чылдың эгезинде шинчилелдери, ийиги кезээнде ТАР үезинде археологтуг тураскаалдарның шинчилелдери, үшкү кезекте 1945-1991 чылдарда археологтуг тураскаалдарның шинчилелдери, дөрткү кезекте 1965-1985 чылдарда шинчилелдер, бешки кезээнде XXl векте археологтуг шинчилелдер кирип турар.
Делгелгениң ажылында Красноярскиден, Хакасиядан эртемденнер киржип келген. Ол ышкаш ТКУ-нуң студентилери, Тываның баштайгылар шимчээшкининиң идепкейжилери сонуургап келген.
Елена Айыжы, төөгү эртемнериниң кандидады, профессор, ТывКУ-нуң башкызы:
— Бөгүн бистерде дыка онзагай байырлал болуп турар. Чүге дээрге төөгү факультеди көшкүн чоннарның амыдырал-чуртталгазын, төөгүзүн, культуразын көргүскен делгелгени организастаан. Мында дыка хөй өске регионнардан археологтар, эртем ажылдакчылары келген. База бир чугаалааксаан чүүлүм – төөгү факультедин тургузарынга үлүг-хуузун киирген эртемден башкывыс Андрей Чолдак-оолович Ашак-оолдуң чырык адынга тураскаадып, 65 харлаан юбилейлиг чылында сактыышкын кылдыр бо хемчегни эрттирип турар.
Оон аңгыда хемчегниң ажыдыышкынының үезинде эртемденниң өөнүң ишти Лариса Болатовна Ашак-оол, чаңгысклассчыларының мурнундан биология эртемнериниң доктору, профессор Сергей Октяевич Ондар, төөгү эртемнериниң доктору, профессор Зоя Юрьевна Доржу болгаш келген аалчылар чылыг-чымчак сактыышкыннарны чугаалаан.
Мира Конгул-оол белеткээн.
Авторнуң тырттырган чуруктары
#фонд_история_отечества
#вехи_тувинской_археологии_110_лет_исследования
