Директорларның кижизидилге талазы-биле чөвүлекчилериниң киржилгези-биле ортумак өөредилге черлеринде корум-чурум үрээшкиннериниң профилактиказынга хамаарышкан айтырыглар дугайында хуралды өөредилге сайыдының хүлээлгезин күүседип турар Ренат Ооржак удуртуп эрттирген. Ук хуралга аныяктар политиказының оралакчы сайыды Сергей Монгуш база киришкен.

Яамының удуртукчузу ортумак өөредилге черлериниң башкылары-биле корум-чурум үрээшкини болган факт бүрүзүн сайгарбышаан, алдынган хемчеглерни контрольдаан. Оон аңгыда 9 класс дооскан соонда, школаларда-даа, техникумнарда-даа өөренмейн турар ажы-төлдүң дугайында айтырыгны көдүрген.

«Моон-даа соңгаар школалар болгаш техникумнар-биле назы четпээн ажы-төлдү өөредилге-кижизидилге ажылынче хаара тудар талазы-биле ажылды уламчылаар мен. 9 класс дооскан оолдар, уругларны техникумнарже кирип алырын сүмелээш, улаштыр школаже өөредип киирбейн турар таварылгалар бары хомуданчыг. Техникум бүрүзүнде тодаргай сан-түң езугаар бөлүктерни тургускан, оон ажыр уругларны хүлээп алыр аргазы чок. Ооң түңнелинде назы четпээн уруглар өөредилгеже хаара туттунмаан болуп, корум-чурум үрээшкиннериниң киржикчилери апарып турар» — деп, Ренат Ооржак хуралды түңнээн.