«Тываның аныяктары» болгаш «Сылдысчыгаш» солуннарның корреспондентизи Кызыл хоорайның 4 дугаар школазының өөреникчилеринге «Ынак башкың кымыл?» деп айтырыгны салган.
Наира Монгуш, 7 «г» класстың өөреникчизи:
— Ол – эң-не эки башкывыс, чамдыкта өөреникчилерни чемгерип каар. Кандыг-даа үелерде дузалажыр. Дыштаныр хонуктарда-даа бажыңынче чалаар. Тыва далган, тыва чемнер кылып бээр, паркка агаарладыр. Август айда огородунда хөй чечектерлиг болур, башкывыстың төрүттүнген хүнүнде байырлаар бис. Мээң ийи дугаар авам-биле дөмей. Ол база биске дыка ынак, биске чүнү-даа кылып бээр. Кончуттунмас, хорадавас. Темаларны дыка билдингир кылдыр тайылбырлаар. Кичээлдери солун. Ажык кичээлдер база болур. Мен аарып-даа тургаш, башкымның кичээлдерин черле үспес дээш кызар мен. Ооң ады – Чайзатмаа Шагдыр-ооловна.
Дарья Монгуш, 7 «г» класстың өөреникчизи:
— Чайзатмаа Шагдыр-ооловна – мээң ынак башкым. Башкым-биле эжишкилер ышкаш чугаалажыр бис. Клазывыс шупту башкывыска ынак бис. Башкывыс-биле кады агаарлаар, бажыңынга баар бис. Пирожкилерни быжыргаш, биске эккеп бээр. Оон эки өөрениңер деп үргүлчү чагыыр.
Кристина, 7 «г» класстың өөреникчизи:
— Мээң ынак башкымның адын Ай-кыс Шолбановна дээр. Ол – дыка эки башкы. Мен башкымның кичээлдеринден «дроби», «частицы» деп чүүлдерни билип алдым. Башкывыска карак-шили дыка тааржыр. Оон ыңай база бир ынак башкымның адын Чайзатмаа Шагдыр-ооловна дээр. Эң-не ынак башкым. Бисти дыка камгалаар, бодаар, черле шупту чүвени айтып бээр. Бо башкымның кичээлинде чүве адын билип алган мен.
Дозураш, 7 «г» класстың өөреникчизи:
— Ол – эң-не хөглүг болгаш билдингир башкы. Черле дыңнаарга-даа, аянныг, кулактар дыштаны бээр. Биске дыка хөй чүүлдерни өөреткен. Бергедээшкиннерге дузалажыр. Мырыңай тенектенип эгелээривиске, чогум кончуптар. Ооң ады – Чайзатмаа Шагдыр-ооловна.
Күдер Ондар, 7-ги классчы:
— Бистиң клазывыста шупту 24 өөреникчи бар. Кичээлдер соонда, күш-культура кичээлинге ойнаар, маңнаар. Дыка солун. Күш-культура болгаш спорт башкызын эки деп бодаар мен.
Алена Нан-Хоо
