Хамык чонну халактадыр – канчаарың ол?!
Каптагайны ээнзиредир – канчаарың ол?!
«Шөлээм алгаш, дыштаныйн» дээн сөзүң кайыл?!
«Шөлээн – черле оожум орайн» дээниң кайыл?!

«Хүлээнгени – күштүг» деп сөс хүлүп алды,
«Даанганы – таптыг» деп сөс бектеп алды,
Хүн караанга, күзээним дег, дөгеленир
Даарта келир. Шыдаш, шыдаш!» дээниң кайыл?!.

Даарта дүштү. Хүлүг-бектен адырылдың.
«Дамырактың дамдызы» бооп хуула бердиң…
Сооң салгаар чонуң хилеп артып калды.
Сорунзалыг уран сөстер өскүс арты.

Харыксыраан, турупкан бол, канчаарың ол?!
Хая көрбес чууза чууктап… Канчаарың ол?!

Лидия Ооржак