Республиканың школаларында Космонавтика хүнүнге тураскааткан хемчеглер уламчылап турар. Кызылдың 9 дугаар гимназиязының өөреникчилери аныяк космонавт Кирилл Песковтуң дугайында ажылдарны бижээн.

«Кирилл Александрович Песков Тывага төрүттүнген. Ооң дугайында шүлүктерни безин бижээн. Россияда космонавтылар хүнүн уткуштур Меңги Бузураштың Кирилл Песковка тураскааткан шүлүүн таныштырайн» — деп, 7 «г» класстың өөреникчизи, «Элээди журналист» бөлгүмүнүң кежигүнү Аюш Бориско бижээн.

Октаргайда сылдыстарда
Оккур аткан сырын-биле
Тыва оглу, менди солчуп,
Тывызыксыг чаңнап туру.

Ак-көк Тыва тугу киискип,
Алдар хүндү арны чырып,
Сеткилинден бердингенин
Секпилдиг оол чагыын берди.

Күзел-сорук, күжүн берген
Күүседикчи даңгыраанга
Бүгү тыва чонга йөрээп,
Бүгүдеге байыр тутту.

Каптагайның каазын көрүп,
Өртемчейни өттүр алгап,
Песков оглу Кириллдии дег,
Өпей чаштар изеп ушсун.

#неделякосмоса_17
#ДеньКосмонавтики