Тывада ат-сураглыг артистер, Көшкендейлерниң өг-бүлези, уругларның кышкы дыштанылгазын өг-бүлеге эрттирерин сүмелеп турар. Кышкы үеде уруглар кижизидилгезин ёзу-чаңчылдарга үндезилеп, чажындан күш-ажылга өөредири, харыысалгага чаңчыктырары чугула деп, культура адырының хүндүткелдиг ажылдакчылары демдеглээн.

Оларның санал-бодалын деткивишаан, уругларга өг-бүлениң ёзу-чаңчылдары, чылыг-чымчак чорук бүргээн дыштанылганы тургузаалыңар.

 Чоокта чаа «Өг-бүлеге дыштанылга» деп республиканың ада-иелериниң ниити өөредилгези эрткенин сагындыраал. Ол «Кышкы дыштанылга үезинде уругларның айыыл чок чоруу» деп чугула темага тураскааттынган. Ада-иелер кышкы дыштанылга үезинде уругларның айыыл чок чоруун хандырарынга хамаарышкан айтырыгларны сайгарып, санал-бодалдары-биле үлешкен.