Шагаан-Арыгның 1 дугаар школазының физика башкызы Евгений Санчай-оол өөреникчилериниң мурнунга, самбыра чанынга, туруп эгелээнинден бээр бир чыл ашкан.
Евгений Тимурович — «Мой учитель»/«Мээң башкым» губернатор төлевилелиниң иштинде «Мен – башкы мен» төлевилелдиң киржикчизи. Эрткен өөредилге чылы ооң чуртталгазында эң-не чырык болуушкуннарны сөңнээн үе болгаш уттундурбас сактыышкыннарны арттырганын ол демдеглээн.
«Уруглар-биле ажылдаары езулуг-ла өөрүнчүг болуушкун болгаш, хүн бүрүде чаа-чаа кайгамчыктыг үелерни сөңнээн. Ажылымның бирги хүнүнден тура уруглар-биле эп-найыралдыг, чылыг-чымчак, бүзүрел долган хамаарылга тургустунган. Уруглар мээң шынчы база ажык сеткилимни дораан билип каапкан. Ынчангаш класска билчилге болгаш деткимче онзагай черни ээлээн» — деп, Евгений Санчай-оол сактып чугаалаан.
Класстың болгаш класстан дашкаар ажыл-чорудулга кызымаккай күш-ажылды негээр, ындыг-даа болза ол чүүл өөредилгени солун болгаш долу болдурган. Аныяк башкы уругларның шуптузунуң кичээнгейин хаара тудуп, кичээлдерде янзы-бүрү онаалгаларны, онзагай аргаларны ажыглап турган. Ооң түңнелинде уруглар эртемнерни сонуургап, кезээде идепкейлиг харыылап, чаа темаларны шын сеткили-биле шиңгээдип эгелээн.
«Бодумнуң дооскан школамга ажылдаары меңээ өөрүнчүг болган. Башкылар коллективи мында бир тускай – бис бот-боттарывыс-биле эки таныжар болганывыстан ажылдаары чиик. Школаның янзы-бүрү хемчеглеринге, мөөрейлеринге шупту киржип, солун, өөрүнчүг үелерни эрттирип турар бис» — деп, Евгений Тимурович чугаалаан.
Башкылаашкын ажылының бирги чылын түңнеп тургаш, ажыл берге-даа болза, эрткен өөредилге чылы хөй-хөй аас-кежикти, өөреникчилери дээш чоргааралды, шилип алган мергежилинге бүзүрелди бергенин Евгений Санчай-оол демдеглээн. Аныяк башкыны келир үеде ам-даа чаа-чаа арга-шинектер, солун төлевилелдер база ынак өөреникчилери-биле уттундурбас ужуражылгалар манап турар!
«Я-учитель»/ «Мен – башкы мен» төлевилел регионнуң өөредилге системазының хөгжүлдезинде кол рольду ойнап турар болгаш, школаларже аныяк кадрларны хаара тудары, өөреникчилерниң билииниң шынарын бедидеринге, аныяктарның чогаадыкчы арга-шинээн сайзырадырынга дузалаар. Ук төлевилелдиң ачызында аныяк башкыларның арга-шинээ илереттинип, регионнуң өөредилге адырының келир үезинче улуг үлүг-хуузун киирер аргалыг.
2025 чылда педагогика талазы-биле дээди өөредилге черлериниң доозукчулары «Я-учитель»/ «Мен – башкы мен» төлевилелдиң шилилде мөөрейинге киржири-биле, чагыгларны август 8-тен эгелээш дужаап болурун сагындыраал.
