Национал школа хөгжүдер институттуң директорунуң оралакчызы Эрик Норбу дыл политиказының талазы-биле күрүне чөвүлелиниң ээлчеглиг хуралынга Тываның школаларның эге класстары бо чылдың төнчүзүнде тыва дыл болгаш чогаалдың чаа өөредилге номнарын алырын дыңнаткан.
Тываның Баштыңы Владислав Ховалыгның даалгазы-биле 38 муң санныг өөредилге номун парладып турар. Бөгүн институт Красноярскиниң «Офсэт» парлалга чери-биле өөредилге номнарын парлаар керээни чарган.
Тываның өөредилге системазының бүгү деңнелдеринде тыва дылды өөредип турар. «Төрээн Тывам» өөредилге программазы республиканың уруглар садтарынга төрээн дылды өөренир арганы берген. Тыва чаштарның ниити санының 80 хире хуузу, азы 20 ажыг муң уруг тыва дыл кичээлдеринде хаара туттунган. Школаларда төрээн дыл кичээлдеринге неделяда беш шакты аңгылаан, 45668 кижи ону аңгы эртем кылдыр өөренип турар.
Тыва дылдың эчис сорулгазын күүседири-биле 1-ден 4 класстарга «Хүрээлел», «Сан» өөредилге номнарын, назы четпээн өөредилгениң «Федералдыг өөредилге программазы» номну, «Төрээн дыл», «Литературлуг номчулга», «Технология», «Күш-культура», «Чурулга уран чүүлү», «Хөгжүм» эртемнеринге федералдыг ажылчын программаларны тос айның дургузунда очулдурган.
Бөгүнде 5-7 класстарга «Төрээн черивистиң төөгүзү. Тыва» өөредилге ному парлаарынга белен. «Төрээн Тывам» өөредилге-методиктиг комплексти чаарткан, аңгы-аңгы хар-назынныг уругларга дидактиктиг материалдарны болгаш көргүзүг пособиелери дээш, өске-даа чүүлдерни ажылдап кылган.
