Бөгүн регионда 10 муң ажыг оолдар, уругларга школаның сөөлгү коңгазы эдер. Сагыш човаар чүве чок школачы амыдырал эрткен, доозукчуларның мурнунда – амыдыралдың улуг оруунче базым болгаш мергежил шилилгези. Республиканың доозукчуларынга Тываның Баштыңы Владислав Ховалыг байыр чедирген.

«Июнь 1-де шылгалдалар эгелээр. Тываның Өөредилге яамызы болгаш тус черниң удуртукчуларынга чаңгыс аай күрүне шылгалдаларының чогумчалыг эртерин хыналдага алырын дилеп тур мен. Шылгалда дужаар пункт бүрүзүнге таарымчалыг болгаш чаңгыс аай байдалды тургузары чугула» — деп, ол МАХ-та каналында бижээн.

Ол ышкаш Владислав Ховалыг доозукчуларга тускай күзээшкиннерни дамчыткан:

— Хүндүлүг 2026 чылдың доозукчулары! Келир үеде төрээн Тывавыстың, улуг чуртувустуң бурунгаар хөгжүлде-сайзыралы силерниң холуңарда дээрзин утпаңар. Ынчангаш күрүне шылгалдаларын чедиишкинниг дужаап, амыдыралда бодуңарның шын туружуңарны тып, бодап алган чиге сорулгаңарны чедип алырын күзедим! Байырлал-биле!

Буян Ооржактың тырттырган чуруу.