Регионнуң удуртукчузу Владислав Ховалыг чурттакчы чоннуң айтырыгларынга дорт эфир таварыштыр харыылаан. Ук харылзааны аныяк специалистер база удуртукчулар кичээнгейлиг дыңнап, боттарының ажыл-ижинге үлегер кылдыр алыры чугаажок. Тываның Аныяктар херектериниң талазы-биле яамының сайыды Субудай Оюн ол дугайында бодунуң блогунда демдеглээн.

Субудай Оюн, ТР-ниң Аныяктар херектериниң талазы-биле сайыды:

— Тываның Баштыңы Владислав Ховалыгның дорт эфирге чурттакчы чон-биле харылзашканын улуг сонуургал-биле көрдүвүс. Бистиң аныяк ажылдакчыларывыс республиканың Баштыңы янзы-бүрү хөй талалыг айтырыгларны шиитпирлеп, ниити хөгжүлде дээш ажылдап турарын херек кырында көрүп, билип алыры чугула деп бодалдыг мен. Тываның Баштыңының хүн бүрүзү куу даң бажындан эгелээш, орай дүнеге чедир хувааттынган. Аныяктар оон үлегер алыры чугула.